Logo
.
...Data venerdì 7 ottobre 2022
...Visite ad oggi 830692  Visitatori
Logo
 

Ambito di Ricerca:La lingua locale: testi e voci
   
Comu si maritaru...
 

immagine allegata



Armando Carruba recita una poesia di Federico Vaccaro (Fefè)

Comu si maritaru Jachinu u vruccularu
e Betta Arripizzatu di nobili casatu

La storia chi vi cuntu è storia vera,
trent'anni hannu passatu di 'stu fattu.
Era 'na matinata 'i primavera
(nun ci ni jiùnciu e mancu ci ni grattu)
quannu Jachinu cu lu so' carrettu
passò d'a strata di li Scupittari,
la vuci 'un ci facìa nuddu difettu
e si firmò un minutu a abbanniari:
- Vròcculi duci, a cincucentu liri,
cugghiuti frischi frischi stamatina.
Si li manciati lu putiti diri
ch'è na pitanza dilicata e fina.
Si ponnu fari: fritti, arriminati,
tu mi hai detto con un filo di voce...
vugghiuti o comu sfinci a la pastetta,
c'u sucu e cu li pàssuli affucati;
p'i vròcculi nun manca la ricetta!
-Betta, chi stava a lu secunnu pianu
'nta lu palazzu di l'Arripizzatu,
pinsava, stinnicchiata nna un divanu,
pi comu capitari un nnammuratu.

La vuci di Jachinu la distò
da chisti sogni di cuncupiscenza:
scinnìu di lu divanu e s'affacciò
pi vìdiri la funti 'i l'eloquenza.
Lu vruccularu stava a nasu a l'aria
e pi chistu cu Betta si taliaru,
vitti ca la picciotta 'un era lària
e ci dissi: - Calassi lu panaru!
Ci mettu un vrucculiddu ch'è speciali,
si lu manciassi in biancu, c'u limiuni,
ca 'u digerisci bonu e nun fa mali! -
E 'ntantu taliava 'u finistruni!
A la picciotta ci piacìu lu garbu
e l'espressioni e puru la prisenza,
ci parsi ca ci avissi fattu sgarbu
e d'accattari si pigghiò licenza!
Jachinu tutta a notti nun durmìu
pinsannu a Betta pi quant'era bedda,
e puru la picciotta, cridu iu,
avìa spinnu di vròcculi a cartedda!

Ma Betta era di nòbili casatu,
mentri Jachinu sulu un vruccularu,
puteva lu baruni Arripizzatu
dari la figghia a cu' nun era paru?!
E' fu accussì, comu 'nto' spissu fannu
li nnammurati quannu cuntrastati,
ca li picciotti studianu lu 'ngannu:
si scrìvinu pi nenti cuntrullati.
Ogni matina in via d'i Scupittari
la vuci di Jachinu si sinteva,
la genti si firmava pi accattari,
ma a iddu u cori forti ci batteva
p'u finistruni d'u secunnu pianu,
d'unni un panaru sempri si calava
cu dintra pizzineddi c'a un cristianu
liggènnuli li carni s'arrizzava:
- T'amu, t'adoru, pensu sulu a tia,
nun dormu e mancu vivu a 'stu pinseru,
pi tia nun mànciu, ca si' a vita mia,
anzi, tranni li vròcculi, pi 'u veru! -
Jachinu, in tempu un nenti, ricambiava
c'un vròcculu farciutu di pizzina:
- Bedda di lu me cori, 'ncuminciava,
nun sàcciu cchiù s'è notti o s'è matina… -
'Sta storia tirò avanti senza affannu
'nfinu ca lu Baruni, 'nsuspittutu,
'nveci d'u capituni, a Capudannu,
truvò 'nto piattu un vròcculu farciutu!
Vularu piatti, seggi e tavolini,
ci foru chianti, grida, scrusci e botti
tantu ca 'nta la strata a li vicini
ci parsi avìa sunatu menzannotti!
Betta chiancìa, ma nun si detti vinta,
ci dissi: - Patri miu, nun c'è chi fari,
si chista barunìa è d'accussì tinta,
è cchiù mégghiu la morti ca campari!
E dittu fattu si pigghiò un vilenu
c'avissi 'ntussicatu a tri cavaddi,
ma lu stòmacu so' ni fici a menu
c'a forza di li vròcculi avìa 'i caddi!
Circava lu baruni Arripizzatu
a la picciotta di disincantari…
nun pòttiru minacci ne avvocatu:
senza Jachinu nun vuleva stari!

Betta s'arriducìu comu un palicu,
la facci smunta, l'occhi spiritati,
la peddi giarna comu un quatru anticu…
parìa a morti in vacanza, in viritati.
P'u dijunu totali e li turmenti
avìa arrivatu quasi in agonia.
La matri dissi o' patri: - Si accunsenti,
po' éssiri sarvata a figghia mia! -

Allura allura, a postu di li sali,
ci fìciru ciarari un vrucculiddu…
s'arruspigghiò, comu si un stava mali,
e ci passò di dintra l'ossa 'u friddu!
Ci dissi lu Baruni: - Figghia mia,
vistu ca l'ami tantu e accussì forti,
si si' cuntenta tu, d'accussì sia,
mégghiu 'i vròcculi in casa ca la morti!
-E fu accussì ca Betta Arripizzatu,
vistuta 'i jancu, s'acchianò l'artaru
cu Jachineddu so' misu a lu latu
e pi buché… di vrocculi un panaru!

 
     
Edizione RodAlia - 29/10/2009
pubblicazione consultata 1162 volte
totale di pagine consultate 763988
Copyright 2008- Ideazione e Coordinamento di Romualdo Guccione - Realizzazione tecnica del sito di Enzo Callari -