CANTONI SCONTI

Cantoni sconti de la me çità

dove che 'l sole riva apena apena

qualche minuto al colmo de l'istà,

dove la neve inveze se scadena

cussita che nel mese de febraro

la xe alta cofà mezo pajaro.

Despersi drio le piazze e in drento al Gheto

vegno a catarve 'l dì de feragosto,

caminando pian pian, solo soleto,

drento un silenzio che 'l par fora posto.

De rivarghe me incorzo dai odori:

pisso de gato, pisso de cristian,

roba marza, fa pomi e pomidori,

muffa e altra roba lassà zo dai can.

Epure me piasì, veci cantoni,

 con quel'aria che ghi da indormenzà,

dai tempi tristi l'è rivà fin qua.

 

Penseve quanti tosi e quante tose

nei secoli, passando par de qua

i s'à scambià struconi, basi e rose

e qualche volta pò, sti lazaroni,

i s'à slongà le man sù pai galoni.

 

Me sento in drento al cuor 'na nostlagia

che no so dir de cossa la sia fata,

forse de zoventù scampada via,

forse d'arfiare el fià de na tosata.

 

Ve saluto, cantoni indormenza',

echi del tempo che par la pontara

dei secoli pian pian xe rodolà.

 

Me pare de sentire 'na chitara

che sona e pianze de malinconia,

ma vien vanti un tosato co 'na tosa

strucandose a la vecia e i tira via.

E vedo da un canton , spuntar 'na rosa.

 

....................................

Cantoni sconti:angoli nascosti; riva:arriva; Ista': estate; Pajaro : Paglialo; Drio: di dietro; Catarve: trovarvi; Incorzo:accorgo; Pisso: piscio; Marza: marcia; Piasi': piacete; Indormenza': addormentati; Galoni: cosce; Arfiare: respirare; Pantara: salita o discesa; Rodola': rotolato

...............................

 Testo e Voce dell'Autore : Pier Giuseppe Cèvese