Logo
.
...Data giovedý 2 aprile 2020
...Visite ad oggi 673016  Visitatori
Logo
 

Ambito di Ricerca:Aspetti sociali
   
Sona la Virmaria
Signiruzzu, chiuviti, chiuviti
 
immagine allegata


LE POESIE DI GIOACCHINO TODARO


 

SONA LA VIRMARIA

 

Sona la Virmaria, chiama la cucca, *

a lu Paisi mìa supra ‘na rocca.

 

la vuci, arriva tantu ‘n luntananza.

Chiama a prigari la so’ figghiulanza

 

ppì li strati, dintra d’ ogni casa,

a paroli o stannu a vucca chiusa.

 

Chiddu ca di cchiù cunta è la fidi

e picchì, finu ‘n funnu, si cci cridi.

 

Ci si “Signava”, tutti, cu’ la manu

ppi Chiddu ca murìu da Veru Homu !

Un Pater, un’Ave et un Gloria,

a ccomu veni, ed a memoria

 

ed un salutu a tutti ppì la via:

comu dicia Cristu a l’ Apostuli sua !

 

Nta lu ‘mmiernu, la sira scinni prestu,

chiusa la porta, si cala la pasta.

 

Dumani, comu sempri, agghiorna all’arba,

c’è di zzappari e di scippari l’erba.

 

Sona la Virmaria, chiama la cucca

da lu so’ nidu fattu ‘nta ‘na sciacca .**

 

Addivintaru surdi a li campani,

a ccom’ a diri: cchiù nu’m’apparteni !

 

Su’ cosi antichi, di li me’ parenti

di quann’eranu poviri e ‘ngnuranti.

 

Nu’ ci si “Signa”, comu s’ un ci fussi,

livaru, puru, Santi e Crucifissi.

 

Ah quali dintra…!! Sunnu tutti ‘nchiazza;

nisceru ppì mangiarisi la pizza.

 

Tanto, ormai, li notti si fannu jiuornu,

sia ‘nta la stasciuni ca di ‘mmiernu

 

Nu’ c’è famigghia, attornu a un tavulinu,

nnì pigghiau postu lu telefoninu,

 

A vidiLu accussì nu’ m’apparteni,

picchì nu’ ci su’ cchiù boni Cristiani.

 

E diri ca pp’ Iddu perdu lu sonnu,

pinsannulu sempri. Corpu di sangu !!!

 

Gioacchino Todaro

 

Enna, 02/02/20

Note :

* cucca = femmina del gufo

** sciacca = fenditura nella roccia

 

X

 

SIGNURUZZU CHIUVITI CHIUVITI

 

Era di ‘mmiernu, ed ancora carusu,

u cielu parìa comu fussi chiusu :

mai ‘na negghia, mancu ‘na muffurata

ppi dari rifrigeriu a lu Criatu

 

U suli, comu fussi ‘u patruni;

la terra, arsa, jittava vuci e vrami

e ‘u lauri, chiancìa ppi la siti

di li radici sua, quasi appassuti .

 

U viddanu nu’ è ca fussi sulu,

a stari sempri cu’ l’occhi a lu cielu,

a prijari, cu’ li vrazza allargati,

picchì vinissi l’acqua suspirata !

 

Si scinnieru li Santi di l’Artari,

ppì prijari a Diu di fari chiuvìri,

e tutti misi ‘n fila, ad unu ad unu,

ppì lu paìsi jieru ‘n pricissioni.

 

U Crucifissu, com’è giustu, primu,

l’Addulurata Matri, assai vicinu,

San Giuseppi, ‘u Patri Pruvvidenti,

cu’ Santa Rusulia, un po’ distanti.

I fimmIni, cu’ ‘n testa lu sciallinu,

i masculi, cu’ li cannili ‘n manu,

tutti a prijari, cu’ pia divuzioni,

ppì la durata di la pricissionini :

 

Signuruzzu, chiuviti chiuviti

i laureddi su’ morti di siti.

E si Vui l’acqua nu’ ci la mannati

siemu tutti poviri e scunsulati

e si Vui l’acqua cci la mannati

siemu tutti ricchi e cunsulati.

 

Deh Matri, ppì to’ Figghiu Addulurata,

saziati la terra tutta cripata.

Deh ! Acqua vuliemu, pani vuliemu

e cu’ tuttu lu cori li ‘nvucamu!

 

San Giusippuzzu, mannatini tanta

d’inchiri puzzi e surgenti vacanti.

Santa Rusulia, mannatila bona

senza lampiari e luntana di trona.

 

Tutti a lu Cielu ‘livamu li mani :

Datici l’acqua ca tantu disiamu!

Acqua vuliemu, duranti la notti

grapiti, d’u cielu, ‘i catarratti. “

 

Turnati li Santi, d’intra li Chiesi:

missi, rusari cu’ voti purmisi.

Sunnu scantati di ‘na mal’annata,

di fari ‘u pitittu, e, ppì ‘na vota,

di nu’ putiri inchiri ‘i cannizzi

e di ‘ncuminciari a nu’fari sfrazzi.

 

Duoppu tri jiorna , cadìu acqua abbunnanti:

dissiru grazii a Diu e tutti li Santi.

L’annata fu ricca ; favi e furmientu,

ppì sciogghiri i voti, nni diettiru tantu .

 

E’ vera fidi ca movi ogni cosa,

no’ lignu di Cruci tinutu appisu !

 

Gioacchino Todaro

 

 

 
     
Edizione RodAlia - 15/03/2020
pubblicazione consultata 50 volte
totale di pagine consultate 630805
Copyright 2008- Ideazione e Coordinamento di Romualdo Guccione - Realizzazione tecnica del sito di Enzo Callari -