Logo
.
...Data mercoledì 20 marzo 2019
...Visite ad oggi 624705  Visitatori
Logo
 

Ambito di Ricerca:Aspetti sociali
   
SICILIAN MEMORIES_27
by Gioacchino Todaro
 
GIOACCHINO TODARO_poesie


immagine allegata

LE POESIE DI GIOACCHINO TODARO


La puddara


Quann’è notti, cercu  lu lustru, nun a casu,
di la Puddara stidda luminusa
e mi rammentu di quantu è d’aiutu
a lu marinaiu malu attrizzatu.

Ad idda avi l’occhi,  comu ad un faru,
da quannu s’adduma, ogni sira,
e spera ‘n cori d’un s’astutari
fin’a quannu  ‘nterra metti lu peri.

Sta sempri ferma, a lu so’ postu
all’orizzonti   la notti resta;
si fa truvari, lu lustru  pì segnu,
da quanti d’idda hannu di  bisognu.

Tutti  ‘nta  ‘sta vita stamu a mari,
ammenzu a tanti cavadduna niri;
ognunu  ha la so’ “ Puddara”
ed a nu’ perdila di vista …ava sperari.

Mi rammentu, ca ‘nta la stashuni,
lu viddanu circava la “Puddura”
e la truvava sempri ‘nta  lu stissu agnuni
ed era sulu pì sapiri l’ura.

Quannu  s’astutava,  comu ‘na cannila:
“ Susiti di cursa e  sedda la mula
ca  n’ atra jiurnata sta pì ‘ncumunciari
cu’ tantu di fatia e di suduri! “

La Puddara, di li stiddi, è la rigina,
macari s’ ‘un porta scettru e curuna;
da tantu tempu,  s’ava sapiri…,    
segna lu Nord e l’am’ a taliari!   

Idda apparteni all’ Ursa Minuri,
comu  nui a Cristu Signuri.
Pì cu cci cridi è la nostra Puddara:
ca  ‘nta ‘sta vita,  cc’am’ affidari !      


Gioacchino Todaro


Lu ritrattu


Si fussi di l’arti e a putirlu fari,
su tila forti, travagghiata a manu,
cu pinnillini ti vurrìa pittari:
comu si fussi un veru Principinu.

Di sciuri majulini di campagna,
d’un pizzicu di terra cu dui stiddi
farìa di sangu e latti li gargiuddi
e, l’occhi, dui tizzuna di castagna.

Di cira d’api, tra lu  scuru e biunnu,
cu sucu russu vivu di granatu
farìa la to’ vuccuzza di scarlatu
e li capiddi su lu visu tunnu.

Di matriperla, rosa culurati,
di pasta riali duci mudillatu
farìa, accussì, l’oricchi pitturati
e lu nasiddu appena sullivatu.

Lu sguardu accattivanti e ridancianu,
chinu,  pì tutti, d’amuri e simpatia,
farìa di tìa, cu l’arti di la manu,
comu nisciutu da ‘na fotografia.

Lu mittirìa in mostra, ‘stu ritrattu,
cu ‘na curnici raccamata d’oru,
su lu comò, accantu a lu me’ lettu:
pi’ sentiri, accussì , lu to’ rispiru!


Gioacchino Todaro

 
     
Edizione RodAlia - 07/03/2019
pubblicazione consultata 13 volte
totale di pagine consultate 583521
Copyright 2008- Ideazione e Coordinamento di Romualdo Guccione - Realizzazione tecnica del sito di Enzo Callari -