Logo
.
...Data mercoledì 19 dicembre 2018
...Visite ad oggi 611195  Visitatori
Logo
 

Ambito di Ricerca:Aspetti sociali, in genere
   
SICILIAN MEMORIES_24
by Gioacchino Todaro
 
GIOACCHINO TODARO_poesie


immagine allegata

LE POESIE DI GIOACCHINO TODARO

U CUMPLIANNU


Ma ch’è bedda ‘sta jiurnata

c’haju a tutti riuniti

pì la festa di ‘na data,

comu a quannu ci su’ zziti.


Siemu tutti ‘mbillittati,

pi comu voli l’accasciuni

ed ia, cuommudu assittatu,

cu’ li parenti a mia vicini.


A vìdili mangiari,

cu’ sbriu, a li me’ spaddi,

mi fa tantu piaciri:

ritornu carusieddu.


Pari fussi comu u’ firmi

ed ia misu a taliari,

ogni cosa pigghia formi

e ci staju u’ po’ a pinsari:


A quann’eru cu’ li me’ cari

a lu paisi mia natiu,

cu’ l’amici a jucari

ca da tiempu cchiù nu’ viu.


A quannu stavu sempri fori,

da la matina a lu scurari

e la casa, pì duviri,

pì manciari e pì durmiri.


A la strata pì com’era,

a li vicini ad unu ad unu,

a la putìa di lu firraru,

a li campani e lu so’ suonu.


Chiddi di lu svigghiarinu,

l’Ave, l’una e li dui di notti,

li festi, missi e pricissioni

e di quannu ci sunnu lutti.


A li festi cchiù ‘mportanti,

lu ricordu dintra tiegnu,

di Natali, di li Santi

e di chiddi di campagna.


Quannu c’era cuntintizza

di mangiari ‘nta li prati,

cu’ cacuocciuli e sasizza

arrustuti e ‘ncinnirati


A la sira di la vecchia,

s’addumannava pì li strati,

chianciennu ogni tanticchia,

vucciddati e miennuli caliati.


A la bona tradizioni

di fari a Pasqua lu martoriu,

cu’ attori tutti nustrani,

cu’ tantu ‘mpignu e disideriu.


Da lu jornu di dda data,

e nun sulu finch’ è vivu,

la figura ‘ntreppitata

si la porta a distintivu.


A San Giuseppi e “ a tavulata”,

cu’ attornu i virginieddi,

ca me’ ma’ avia fattu votu

d’ammitari i puvurieddi.


No’ pì comu fannu ora:

na minnitta* pi grannizza; (* spreco)

a ddi tiempi propriu ‘u c’era

dari a chiddi ca su sazi.


A li cinima all’apertu

pì li festi a la stasciuni,

sia lu luongu ca lu curtu

cu’ li seggi ‘n pricissioni.


A li bummi a la stazioni,

a li strati principali

cu’ surdati ‘miricani:

pì sicaretti e carameli

s’hannu prisu lu Cumuni.


A l’artarini di l’Assunta,

ca ci nn’ è ‘n tanti strati,

addubbati di trapunta

e di linzola ‘rraccamati.


Stearine ‘n bedda mostra,

piante e sciuri ‘nta la grasta,

cutri e luci a la finistra

e nuvena pì la festa.




A quannu , t'annu, si usava,

sia a li nichi c’a li viecchi,

u pirchì nu’ si sapiva,

di tirarici l’aricchi.


Si, pi casu, si pinsava

e la sorti era binigna,

ca ddu jornu si famiava,

c’era u’ bieddu pan di spagna.


A tant’atri accadimenti

ca nu’ staju a raccuntari,

cosi buoni e cosi tinti

comu ognunu po’ pinsari. “


Ma, di bottu, finì l’incantu

pì ‘n’applausu a ‘u fistiggiatu,

ca facissi nota e cuntu

di com’è ca cc’ha ‘rrivatu.


Li me’ anni sunnu tanti,

ca ia stissu nu’ ci criu

e ringraziu tutti i Santi

e, pi primu, ‘u Nostru Diu.


Ora sugnu addimuratu,

senza darmi ‘na ragiuni

e la bona e tinta annata

l’haju misu nt’ u casciuni.



Siemu tutti quanti strani…,

e lu vogghiu propriu diri,

pari c’ad atri apparteni…

nu’ vidiennuli passari !


Sarà, forsi, c’ haju taliatu

cu’ la menti sulu avanti,

sempri drittu, mai di latu…

e perciò nu’ li rammientu!


Sunnu picca o sunnu tanti,

sunnu mia e nu’ li dugnu,

vogghiu dirvi sulamenti:

cc’haju misu tantu ‘mpegnu !


Haju fattu lu duviri

pì la casa e la Nazione

e lu pozzu puru duri

cu’ mudestia e dedizione.


Amu Diu ed a tutti l’Atri,

comu tutti i siciliani:

S.Giuseppi e ‘a Bedda Matri

ca cc’haju jiutu ‘n pricissioni !


Di Sant’Anna su’ gilusu,

a la menti tiegnu fissa,

la mia chiesa di carusu

pì nuveni e pì la missa.


Chi ricetta v’haju a dari…,

mancu fussi magu Piddu,

lu sigretu pi campari

lu canusci sulu Iddu !

 

Nta ‘stu munnu cuntrastatu

u senziu cchiù nu’ reggi;

nvucamu lu So’ aiutu

a pì quantu ci pruteggi !


M’ha sarvatu da perigghi

e ad Iddu haju fattu voti:

pì me’ mugghi e li me’ figghi,

pì me’ nora e me’ niputi.


Sugnu tantu furtunatu,

si macari cu ’ l’affanni…,

ca paremu ancora zziti

dopu quasi cinquant’anni.


Ora ammitu a vui prisenti

e lu dicu senza ‘nganni,

a ritruvarci tutti quanti…

a fra n’atri ottant’anni !


Gioacchino Todaro
 
     
Edizione RodAlia - 29/10/2018
pubblicazione consultata 66 volte
totale di pagine consultate 571470
Copyright 2008- Ideazione e Coordinamento di Romualdo Guccione - Realizzazione tecnica del sito di Enzo Callari -