Logo
.
...Data mercoledì 19 dicembre 2018
...Visite ad oggi 611260  Visitatori
Logo
 

Ambito di Ricerca:Aspetti sociali, in genere
   
SICILIAN MEMORIES_8
by Giocchino Todaro
 
GIOACCHINO TODARO_poesie


immagine allegata

LE POESIE DI GIOACCHINO TODARO

TIEMPU DI CIRASI


Era di giugnu, tiempu di cirasi,

quannu ti vitti cu’ ‘na trizza ‘mmanu

e lu panaru, puru, avevi chinu

cu’ supra d’iddu un mazzu di rosi.


Pì la fatìa e pì lu primu suli:

la facci russa comu paparina;

di biancu-rosa avevi la vistina:

eri palumma a li so’ primi voli.


Già cunuscìa la bedda tua pirsuna

p’avirla vista da’ la cantunera

prima ca facissi ancora sira:

turnavi di fari la sartina.


Ed atri voti, tutt’arrizzittata

vistuta a festa cu’ li capiddi frischi:

comu di meli pì pigghiari muschi

passavi cu’ l’amica tua fidata.


Pigghiai curaggiu, quantu cu’ du’ mani,

e addumannaì di darminni quarcuna;

pì risposta fu da mia la fuìtina:

lassannumi accussì com’un minchiuni.


Lu sangu si gelò ‘nda li me vini

p’aviri fattu ‘sta mala figura.

A chistu piansu quannu giugnu veni

e a quannu la cirasa è già matura.


Eri palumma a li to’ primi voli

e ìu picciuni, senza ancora l’ali.

________________

Gioacchino Todaro

CHI MI NNI FAZZU?


Chi mi nni fazzu di l’ugna pittati

s’aju li gammi di ferru filatu

ca nu’ mi tjenunu mancu a l’addritta:

parinu fatti di tuma e ricotta.


Chi mi nni fazzu d’un paru di scarpi

si li me’ piedi su’cuomu li serpi:

ca striscianu ‘n terra matina e sira

e su’ buani sulu a lustrari la cira.


Chi mi nni fazzu d’oru e biddizza

si nu’ li mostru a l’amici 'a la chiazza;

è comu ad aviri un beddu vistitu

tinutu chiusu , misu ammucciatu.


Chi mi nni fazzu d’un cunto a la banca,

di casi e tirreni a la manca, 

si pì li mali ca ti vidi arrivari

su’ comu mummi ca' stannu a taliari.


Chi mi nni fazzu di pizzu e merlettu

s’è sulu pi’ stari ‘nta un funnu di lettu.

‘Na sula cosa mi servi d’aviri:

tanta saluti da putiri satari !
_______________

Gioacchino Todaro



 
     
Edizione RodAlia - 17/03/2018
pubblicazione consultata 175 volte
totale di pagine consultate 571489
Copyright 2008- Ideazione e Coordinamento di Romualdo Guccione - Realizzazione tecnica del sito di Enzo Callari -