CHI RICCHIZZA !!!
Chi ricchizza, chi ricchizza
ppì nui tutti la munnizza !
Cci nn’avemu ppì li strati
e li chiazzi ammarunati.
Sutta puru li finestri
di li scoli e li palestri.
nun si sarvanu l’asili
e nimmenu li spitali.
Nta li spiaggi, bianchi e lisci,
a purtala è lu mari,
si nni pasciunu li pisci
ca la scancia ppì mangiari.
Ed è tanta l’abbunnanza,
u’ parramu ppi li festi,
puru robba di sustanza,
scatulami e tanti cesti.
C’è di genti ca s’addestra,
s’un ci sunnu guardie e sbirri,
di jittarla da’ finestra,
da la motu mentri curri.
La mannamu puru fora,
nu’ sapennula sfruttari,
a pagamu a pisu d’oru
mentri l’atri fannu affari.
E nni resta ancora tanta,
la discarica è china,
la Regioni è gia’ pronta
a spidirla sulla Luna.
C’è l’ammiria di lu Munnu,
d’unni veni tantu sfarzo,
ca cc’abbunna ad ogni annu,
mancu in chiddu dittu “Terzo”!
Nta l’estati, li turisti
stannu tutti a fari fotu,
sunnu opiri d’artisti:
vannu, dunque, ‘mmortalati !
Comu Roma, nu’ c’è ’guale!
Di l’Italia è capitale!
Ed è giustu d’ammustrari
tutti quanti i so’ tesori.
Ci nnè tanti….. tali e quali!
Cu Palermu vannu a spadda
ed essennu Capitali…..
ogni tantu si fa bedda.
A ‘stu puntu, m’addumannu:
Unni nu’ si vidi nenti,
d’atri parti di lu munnu,
si la mangianu li genti? “
Ci nn’avemu d’ammucciata
sutta terra, ncupunata,
c'è di chidda ch’è cchiù rara
chiusa d’intra ‘na minera.
Si nni stannu tutti muti,
fannu finta d’ u’ sapiri ,
c’è di mezzu la saluti
cu’ malanni da muriri !
Ama diri: “ tanti grazi ”
a la “ Mala “ ppì ‘sti sfrazzi,
comu s’idda stassi a parti
a campari supra Marti.
Cu’ li fuochi e tantu fumu, (1)
s’ha ‘ccucchiata ‘na ricchizza
cu’ la tassa ca pagamu:
Viva, viva la Munnizza !!!
Gioacchno Todaro
Enna, 26/01/2020
Note (1) Riferito, in particolare, alla Terra dei fuochi, tra le provincie di Napoli e Caserta, e non solo
|
Lu novu anno
LU NOVU ANNO
"Sta `rrivannu lu novu annu...., ma li guai sunnu vecchi!" Dicia me nannu tra u` piattu di linticchi. Lu travagghiu...,picca o nenti, lu bisugnu...,sempri assai; chistu sempri haiu `n menti: comu ora...,quannu mai!!! Li picciotti hannu peni..., su ridutti a mali modi: nu`si spusanu cu vonnu beni e si mittinu "a godi e godi". Comu tannu..,macari ora, stannu a diri la stissa cosa: ""Damu a tutti pi campari e livamu ogni `mprisa!"" ""Speramu a l`annu novu.... ca d`ogni beni fussi riccu!"" Dicia lu me Avu.., tra `na sucata di tabaccu! Gioacchino Todaro
|