Nr. d'ordine 1
Alia
Alia paisi mia di petri e crita,
di timpi, di cunzarra e di
vadduna,
di ficudinnia, di furmientu e
'ntrita,
di sparaci sarvaggi e di carduna.
Di 'nzolia, di guarnaccia e
muscatieddu,
di bifari e di puma cannameli,
di vinu buonu 'nta lu carratieddu,
di vrischi chini di gustusu meli.
Di caciu picurinu e di ricotta,
di carni di castratu sapurusa,
di vurciddata, scattati e
viscotta,
di virduredda tennira e gustusa.
Di mastri, prufissura ed' artigiani,
di sbirri di parrini e di carusi,
di iurnatera miseri e viddani,
di bizzuccheddi e fimmini sbriusi!
Di quattru stravacanti sparrittera,
di gran travagghiatura e di
lagnusi,
di scattiatura e genti di galera,
di "gran puliticanti"
prisuntusi!
Di la muntagna, tu, si la patruna;
di lu vientu ti guodi la friscura;
di la matina, a l'arrivu di la
luna,
di lu suli ti guodi la calura.
Di li tò doti ia nni vaiu pazzu,
di l'amuri pi tia mi nni
sdilliziu,
di li tò peni parru cu mmarazzu
di certu è chissu lu me bruttu
viziu!
Cirinè
_______________________
Nr. d'ordine 3
ME PATRI DISPIERSU
(Testo + Audio )
Quannu nascìu, me Patri era luntanu,
pi fari lu duviri di surdatu
e 'nta na littra scrissi di sò
manu
ca nun sapia s'avissi riturnatu.
Finì la guerra e reduci e firiti
turnaru ad'abbrazzarisi a li
figghi,
turnaru a li mugghieri li mariti,
si li vasaru cu milli amminzigghi.
Ma di me Patri nun si sappi nenti,
si l'agghiuttì la furia di la
guerra,
e, comu tanti autri nnuccenti,
nun potti riturnari a la so terra.
Haiu 'nta lu me cori gran duluri,
d'aviri paci nun truovu nuddu
viersu,
peni un mi potti dari e mancu
amuri
ca, a causa di la guerra, fù
dispiersu.
Dispiersu, 'nta na terra furastera,
forsi affamatu e chinu di tirruri,
luntanu di la terra sua sincera,
senza famigghia, senza casa e
amuri.
Me Nanna sinni iu diciennu: figghiu
picchi un turnasti cchiù 'nta li
me
vrazza?
La guerra t'affirrau comu lu
nigghiu
ca palummedda afferra, scanna e
strazza!
Me Matri, puvuredda, aspetta ancora
di vidiri lu sò beni,
ed' ogni sira affaccia
all'antalora,
ma iddu nun torna... e criscinu li
peni!
Cu fù chi m'addutà sta mala sorti?
Ca m'è purtari fina 'nta la fossa?
Cu mi la detti sta cunnanna a morti
d'un vidiri a me Patri 'ncari
ed'ossa?
Na vuci di lu scuru m'arrispunni,
vuci sicura, scanusciuta e forti,
ca 'nta lu cori cchiù pena
m'infunni
picchì cunferma la me malasorti:
"Fu l'omu cchiù fitenti di la
terra,
c'aviennu gran disiu di cumannari,
senza pinzari a nenti dissi:
guerra
e detti fuocu a terra, cielu e
mari".
O Diu, ca di lu cielu tuttu vidi,
aiutalu, s'è vivu a riturnari.
S'è muortu t'addumannu cu gran fidi:
all'arma sua la paci tu cci à
dari.
Dammi un signali di la tò putenza,
duna risposta a st'arma dispirata,
dimmi s'è ancora prontu a la
partenza
o si arriposa ....sutta na valata!
Cirinè
_______________________
|
Nr. d'ordine 2
La
prima comunioni di me' figghia
Oh picciridda mia graziusa e
bedda,
astuta attentamenti la mè vuci,
pigghiala a guida comu fussi
stidda,
tienila sempri 'mmenti armuzza
duci!
Lu tiempu passa e tu, Patrizia, crisci,
iannu 'ncuontru ad'un munnu c'un
canusci,
cu li carnuzzi signati di li fasci
nenti tu sai di malu e azioni
vasci!
Oi abbicini pi la prima vota,
a la menza di Cristu redenturi;
vacci cuntenta figghiuzza adurata,
ca Gesuzzu t'abbrazza a lu sò
cori!
E quannu t'ha abbrazzatu un lu lassari,
tienilu strittu nun l'abbandunari;
resta sempri vicina a lu Signuri
ca d'ogni mali ti sapi guardari!
Mentri t'abbrazza dicci sutta vuci,
ca si tò pà nun lu va trova spissu
nun è picchì si scorda di la Cruci
né mancu ca pi Iddu è Crucifissu!
Dumanna pi tò matri longa vita,
ma senza troppi peni e
tropp'affanni,
cu tutta l'arma dicci chi l'aiuta
a ghiri avanti senza malanni!
E pua ti vuogghiu diri, picciridda,
oi ca sì bianca comu palummedda,
pulita comu la tò vistinedda:
resta accussì, pulita, armuzza
bedda!
La vita, gioia, è comu na vanedda
unni li spini ti puonnu sfardari,
ma siddu tu camini canziatedda,
mai nudda spina ti putrà linziari!
Ora vatinni cu l' atri picciriddi,
pigghia la cruna, pigghiati lu
gigghiu,
va nnì Gesù c'un coru d'anciuliddi
mentri na larma m'asciucu di lu
cigghiu.
Cirinè
_______________________
Nr. d'ordine 4
A ME MATRI
( Testo + Audio )
Matri nascisti 'nta na terra amica
biniditta di Diu e di la natura,
ma la sorti, ca a tia ti fù
nnimica,
ti cunnannau a na malavintura.
Tu, ca p' amari lassasti patri e matri,
li frati, la tò terra e li tò
amici,
vinisti 'nta na terra tutta petri
unni si campa a stienti e
sacrifici.
La mala sorti t'arrubbà l'amuri;
chidd'omu ca pi tia valia un
tesoru,
e ti lassau cu du criaturi
ca cuntanu pi tia cchiossà di
l'oru.
Li soggiri ti tinniru pi figghia,
cu gran rispiettu e
cunsidirazioni,
e divintasti riggina di famigghia
di vicinatu e di pupulazioni.
Li viecchi li sirvisti cu decoru,
'nfina a la morti, cu gran
divuzioni
e iddi ti lassaru un gran tesoru:
di tuttu l'Alia stima e
ammirazioni.
Nni masticasti di muccuna amari
pi dari aiutu a parienti ed' amici
e, senza ricumpenzi né dinari,
tu dasti aiutu a poviri e
'nfilici.
'Mpittasti cu duttura e cu avvucati,
cu sinnaci, 'mpiegati e
funzionari.
Pi dari aiutu a viduvi e malati
puri "putenti" facisti
canziari!
Nica com'eri cu putia pinzari
cavissí forza di na liunissa,
ca mancu la natura potti fari
la prova di pigghiariti pi fissa.
A ottant'anni sì bianca e minuta
e, 'nta la vecchia casa di me
patri,
puru si sula stai, c'è cu t'aiuta
e ti pruteggi puru di li latri.
Quannu ti pari avissi a sciddicari
na manu ti susteni cara matri;
spissu ti veni 'ntesta di pinzari
ca ti susteni l'ummra di me patri!
Cirinè
_______________________
|
